فرح الباشه الصغير ابن الباشه الكبير والدعوه عامه

السلام عليكــم ورحمـة الله وبركاتــة ،،

بســم الله الـرحمــن الرحيــم

معكم محدثكم من احدى المناطق الحارة ينقل لكم مهرجان كان قصدى فرح ابن النائب المحترم
ومعانا الحاج عوضين ابن الدايرة هايقول لنا التفاصيل
والان نترك الميكروفون للحاج عوضين
سلامو عليكو انى عوضين ابن الدايرة انهارده فرح معالى الباشه ابن النايب بتاعنا وزى مانتوا شايفين اهوه
الفرح على مساحة 50 فدان والشادر كبير واحد لينا احنا وواحد تانى اللى هناك دهوت للناس الكبيره اللى هما نايبين برضه ووزا
سعت الباشه النايب بتاعنا جاب 40 عجل عشان الكل ياكل وجال لنا الدايرة كلها معزومه على الفرح ده ولازم تنبسطوا كلكوا
انى بجى كان ليا دور كبير جوى فى الفرح ده حاكم انى جريب النايب بتاعنا هو جالى كده لما جه يترشح للانتخابات وجالى ياعوضين
جد جد جدك كان اخو جد جد جدى وانى بصراحه ماكنتش نعرف الحته دى
المهم انى بجى جبت العربيات ولفيت على الدايرة كلها وعزمتهم على الفرح ولما عرفوا ان سعد الصغير جوى جوى جاى الفرح انبسطوا وزجططوا وجالوا كلنا هانيجى يا عوضين (جال عشان سعد جال دول جايين ياكلوا ببلاش )
سعت الباشه كان عامل حساب لكل حاجه فى الفرح وجاب ب 200 الف جنيه ميه معدنيه عشان البشوات صحابه فى البرمان يشربوا
وكمان عشان الغلابه اللى زينا ( جلبه كبير والله النايب ده )
وكمان سعت الباشه النايب بتاعنا كان جايب القنوات بتاعت التلفزيون تصور الفرح بتاع ابنه الباشه الصغير
والباشه الصغير ده بجى قبطان كان ف الاكادميه البحريه والبحريه دى جايه من كلمة بحر يعنى الباشه الصغير قبطان جد الدنيا
لما الباشه الصغير اتخرج وخد الشهاده ماكانش الباشه النايب بتاعنا بجى نايب وكان عايز يتوظف فى البحر جه النايب بتاعنا جبل مايبى نايب جاله يابنى لو حصلت نشترى لك فالوكه وتركبها هانشترى لك
لكن دلوجتى بجى بعد الباشه الكبير مابجى نايب جد الدنيا عمل للباشا الصغير شركة استيراد وتصدير بيصدر ايه الله اعلم
المهم دلوجتى الفرح ده ياجماعه كلف معالى الباشه النايب 5 مليون جنيه عدا ونجدا وفرزا وبصراحه الرقم ده اول مرة نسمعه ف حياتى
ماكنتش نعرف يعنى ايه المليونات دى بس انا جولت للباشا النايب بتاعنا ياباشه الدايرة محتاجه مستشفى ووحده صحيه ومركز شباب
ده غير البيوت اللى مادخلهاش ميه ياباشه
جالى ياعوضين خليك واعى الحاجات دى الحكومه هيا اللى بتعملها لينا وانى ياعوضين هانجدم طلب احاطه للمجلس وهايعملوا اللازم

وبعدين ياجماعه النايب بتاعنا الله يديله الصحه والخير ليه مواجف كتير تنحسب له يعنى فى انتخابات معالى الريس اللى بجوله من مكانى ده
كل سنه وانت طيب ياريسنا وانى كان نفسى نحضر حفلة عيد ميلادك
المهم بجى فى انتخابات الريس النايب بتاعنا صرف من جيبه يجى 3 مليون جنيه من جيبه الخاص ( قال يعنى بدون مقابل ) وجاب يفط
وكتب عليها انه بيبايع الريس لفترة الرئاسه اللى جايه
واما الريس نجح اختاروا النايب بتاعنا تبع الحزب الوطنى الديموجراطى واما جت انتخابات المجلس النايب بتاعنا صرف على الحمله
بتاعت الانتخابات دى 8 مليون جنيه دعايه واعلان ده غير كل يوم كان بيدبح عجلين عشان الناس تاكل
والله ياجماعه الراجل ده بيصرف صرف الله يكون فى عونه واللى بيضايجنى بجى الناس تجول هو عملنا ايه ؟ مش كفايه واكلين ومزجططين فى فرح الباشه الصغير الراجل هايعمل معاكوا ايه اكتر من كده ده غير انه جالى ياعوضين احنا شعارنا بعد مانجحنا
فى الانتخابات لا للخدمات الفرديه نعم للخدمات الجماعيه
وبعد اذنكم ياجماعه عشان سعد الصغير جوى جوى وطارج الشيخ جم وانى هانستجبلهم بالمناسبه اتفرجوا على سعد وهو هايغنى
للنايب بتاعنا اغنية الكلام على مين سلامو عليكو

ودلوقتى بعد ماسمعنا كلام اخونا عوضين انا ليا كلمتين
مش عيب ان الباشا يفرح لكن العيب انه يعمل فرح بكام مليون وتبص تلاقى كام الف شاب واقف بيقول انا نفسى اتجوز حتى منغير فرح
مش عيب الباشا يصرف كل ده لكن العيب انه يبقى فى ناس بتموت من الجوع وناس مش لاقيه تجيب العلاج لنفسها
مش عيب الباشا يعمل دعايه للريس بكام مليون برغم ان الريس مش محتاج لدعايه لكن العيب انه كان يقدر يبنى مصنع يوظف بيه 1000 واحد وكانت دى هاتبقى احلى دعايه للريس
مش عيب ان الباشا يصرف ملايين دعايه لحملته الانتخابيه اللى فاتت ولكن العيب انك تلاقى ناس بتقوله بالروح بالدم نفديك وهدومهم مقطعه

والسؤال اللى انا مش لاقى له اجابه هل واحد فى خلال سنتين صرف اكتر من 15 مليون على كلام فارغ زى دة ثروته كام برغم ان والده
كان ........ كان ........ فلاح ؟
السؤال التانى بقى اللى يصرف الفلوس دى كلها عشان الحصانه ايه الهدف منها ؟
السؤال التالت ده حرام ولا حلال

كان معكم *(عابر سبيل)*

دمتم بود فى امان الله